Мектептердин рейтинги аныкталды

Ош шаарындагы мамлекеттик мектептердин 2017-2018-окуу жылындагы рейтинги аныкталды. Бул тууралуу Ош шаардык билим берүү башкармалыгын усулдук борборунун жетекчиси Кумарбек Раманов билдирди.

Маалыматка ылайык, аталган рейтингди чыгаруу жана андагы каралуучу 28 критерий окуу жылынын башындагы Ош шаардык билим берүү башкармалыгынын кезектеги коллегиялык жыйынында кабыл алынган.

«Шаарыбыздагы мектептердин рейтингдерин чыгаруудагы негизги максатыбыз — билим берүү мекемелеринин жетишкендиктерин белгилөө аркылуу алардын арасындагы атаандаштыкты жаратуу менен окуу-тарбиялоо жараянын жогорулатуу болду. Мында биз мектепти баалоодо негизги 4 багыт, атап айтканда, алардын билим берүү жаатындагы көрсөткүчтөрү, тарбия жараянын жакшыртуудагы натыйжалуу аракеттери, жетекчиликтин ишмердүүлүгү жана материалдык-техникалык базаны чыңдоодогу жигердүүлүктөрү боюнча карадык», – дейт К.Раманов.

Ош шаарында азыркы тапта иштеп жаткан мамлекеттик мектептердин рейтинги өткөн окуу жылында да чыгарылып, анда мектептер бири-бири менен салыштырылган. Ал эми быйылкы рейтингде мектептер өткөн жыл менен кошо өзү менен өзү салыштырылып, алардын өсүү темпи жана жетишсиздиги аныкталды.

«Жаш мугалим – 2018» сынагын кыргыз тилчи Тайыр кызы Нургүл жеңди.

Ош шаарында алгач ирет «Жаш мугалим – 2018» сынагы өтүп, ал Жогорку Кеңештин депутаты, коомдук ишмер Абдывахап Нурбаевдин демилгеси жана демөөрчүлүгү менен Ош шаардык билим берүү башкармалыгы тарабынан уюштурулду.

Ош шаарындагы 4 миңге жакын мугалимдеринин арасынан суурулуп чыгып, сынактын буга чейинки баскычтарында майда көздүү чоң электен өтүп келген финалисттер, жобого ылайык, стажы 3 жылдан өтпөгөн билим берүү кызматкерлеринин арасынан тандалды.

Алар Ош шаарындагы Юрий Гагариндин атын алып жүргөн №17 мектеп-гимназиясынын математика мугалими Таабалдиев Сүйүнбай, эки элдин достугуна орток көпүрө «Кыргыз-түрк достугу» атындагы №52 лицейдин кыргыз тили жана адабияты мугалими Шамырзаев Илгиз, Жапалак айылында жайгашкан №48 мектептин кыргыз тили жана адабияты мугалими Мухамеджан кызы Айдай, дагы бир кыргыз тили жана адабияты мугалими, №33 Самудин Алымкулов орто мектебинин жаш адиси Орозбекова Ырысгүл, шаардагы жалгыз Валентина Терешкова атындагы №11 интернат мектебинин информатиги Касымов Эламан, буга чейин өткөрүлгөн мугалимдердин диагностикалык аттестациясында тарых мугалимдеринин арасында 1-орунду ээлеген №18 Алишер Навои мектеп-гимназиясынан келген Бабаназар уулу Исабек, жаш экенине карабай, таптаган окуучулары республикалык таймаштарда беттегенин бербей келе жаткан №27 XXIV Партсъезд орто мектебинин кыргыз тили жана адабияты мугалими Тайыр кызы Нургүл болду.

Сынактын финалдык баскычынынын 7 катышуучусуна калоо-тилегин айтуу менен бул салтанаттуу иш-чаранын негизги бөлүгүн Ош шаардык билим берүү башкармалыгынын башчысы Асанов Авазбек ачып берди. Ал жаш мугалимдердин демине дем, күчүнө күч кошкон баалуу сөздөрдү айтып, бул сынак жаш мугалимдердин айталбай жаткан ички көйгөйлөрүн элге айтып алуу үчүн ачылган мүмкүнчүлүк экенин баса белгилеп өттү.

Сынактын финалдык баскычы төмөнкүдөй бөлүктөр менен коштолду:
1. «Менин педагогикалык өнөрканам» аттуу көргөзмөлөр болуп, мында жаш мугалимдер өздөрүнүн усулдук колдонмолорун жана башка жасаган иштерин элге көрсөтө алышты.
2. «Сапаттуу билимге такшалган мугалим» аттуу өздүк презентация. Мында катышуучулар педагогикалык концепсияларын коргоду.
3. Мастер-класс, башкача айтканда, педагогикалык кырдаалдан чыгуу.
4. Полиглот мүнөтү болуп, мында катышуучулар түрдүү педагогикалык терминдерди чечмелеп беришти.
5. Блиц-турнир, башкача айтканда, чукул суроолор берилип, финалисттер жооп жазышты.
6. Эң соңку «Өнөр – кесип тандабайт» аттуу бөлүктө таланттуу мугалимдер кесиптик жана чыгармачылык шыктарын элге тартуулап берди.

«Бүгүнкү сынактын буга чейинки баскычтары тууралуу азыноолак айтып өтсөк, алгач мектептик баскычы өткөрүлүп, андан суурулуп чыккан катышуучулардын саны 40ка чукулдап, үстүбүздөгү жылдын башында андан тандалып чыккан 18 мугалимдин ачык сабактарына күбө болдук. Андан сырткары, бул сынакка катышкан кесиптештерибиздин мугалимдердин диагностикалык аттестациясында алган упайлары эске алынды. Сынактын кыл көпүрөсү, майда көздүү элегинен өткөн 7 финалчы үчүн социалдык баракчаларыбызда добуш берүү уюштурулуп, андагы кызуу талкуулар интернет бетин бербей келди», – деди аталган сынактын уюштуруучуларынын бири Тынчтыкбек Досмуратов.

Анын айтымында, билим берүү кызматкерлерин ар тараптан колдоого алып, көмөк көрсөтүп, бул кароо-сынакты да демилгелеп, демөөрчүлүк кылып, мугалимдерди чыгармачылык менен иштөөгө үндөп келген Жогорку Кеңештин депутаты, коомдук ишмер Абдывахап Нурбаев атайын борбор шаардан келип, сынактын финалдык баскычына баштан-аяк катышып, сөзгө чыккан.

А.Нурбаев бул сынактын жүрүшүндө өздөрүнүн умтулуусу менен предметтик олимпиадада республикада Ош шаарын алга сүрөгөн окуучуларды жана билим берүү жараянына зор салым кошуп келе жаткан мугалимдерди, ошондой эле сынактын финалдык баскычынын катышуучуларын баалуу белектер жана акчалай сыктыктар менен сыйлады.

Жыйынтыгында №27 XXIV Партсъезд мектебинин кыргыз тили жана адабияты мугалими Тайыр кызы Нургүл баш байгени багындырып, атайын акчалай сыйлык, грамота жана А.Нурбаевдин «Жаш мугалим» кубогу менен сыйланды. Андан башка 5 катышуучу да алган орундарына жараша акчалай сыйлык жана Ош шаардык билим берүү башкармалыгынын грамоталары менен сыйланышты.

АЛТЫНЧЫ КЛАССТАР АРАСЫНДА МАТЕМАТИКА БОЮНЧА ОЛИМПИАДА ӨТТҮ!

Алтынчы класстар арасында математика боюнча олимпиада өттү.

Бүгүн, 3-март күнү Оштогу Курманжан Датка атындагы кыздар лицейинде шаардагы мектеп окуучулары үчүн АКМО (алтынча класстардын математикалык олимпиадасы) болуп өттү. Аталган олимпиаданын I баскычына Ош шаарындагы бардык мектептерден 5тен окуучу болуп, жалпы 324 жалпы окуучу катышты.
Математика боюнча олимпиаданын бул баскычынын жыйынтыгында окуучулар атайын сертификаттар менен сыйланышып, 2018-жылдын 31-мартында боло турган олимпиаданын II баскычына 44 окуучу жолдомо алды.

ОШТО ОКУУЧУЛАРДЫН ОЛИМПИАДАСЫНЫН РЕГИОНАЛДЫК БАСКЫЧЫ ӨТТҮ

Ош шаардык билим берүү башкармалыгын 26-январдагы № 17/01-8 буйругунун негизинде 26-27-февраль күндөрү шаардагы № 52 “Кыргыз-Түрк достугу” атындагы мектеп лицейинин базасында предметтик олимпиаданын III (регионалдык) баскычы болуп өттү. Олимпиаданын бул баскычына Ош шаарындагы мектептерден жалпы 188 окуучу катышып, алардын эмгектерин так жана калыс баалоо үчүн 51 кишиден турган комиссиянын курамы, 9 кишиден турган уюштуруу тобу түзүлгөн.

Олимпиада эрте мененки саат 9:00 дө башталып, кечки саат 16:00дө (апелляцияга кеткен убакытты кошкондо) аяктады. Олимпиада учурунда көзөмөлчүлөрдүн тобу уюштурулуп, ага ата-энелер жана коомчулуктун өкүлдөрү катышты.

Жаңы Жобого ылайык олимпиаданын бул баскычында окуучулар окуган классына эмес, жалпы көрсөткүчүнө карап 1-2-орунду ээлеген катышуучулар IV (республикалык) баскычка жолдомо алышты.

Олимпиаданын бул баскычында алдыңкы орунга ээ болгон окуучулары көп болуп, IV (республикалык) баскычка жолдомо алган мектептер Ош шаарындагы № 52 “Кыргыз-түрк достугу”, “Сема”, “Сапат”, “Билим” лицейлери, № 20 И. Раззаков жана “Олимп” гимназия мектеби, ошондой эле № 32 Ж. Мамытов орто мектептери болду.

Быйылкы олимпиаданын дагы бир өзгөчөлүгү – апелляциянын азайгандыгы болду. Жылдан жылга апелляциянын азайгандыгы – окуучулардын дагы, ата-энелердин дагы ишенимин арттырат. Муну менен катар катышуучулардын ар биринин өз иштерин жактоо учуру видеотасмага алынгандыгы да жетишкендик катары бааланды. Бул ар кандай талаш-тартыш маселелер чыкканда дагы туура, далилдүү жана адилеттүү чечкенге жол ачат.

Ч. Айтматовтун 90 жылдыгына карата башталгыч класстар үчүн кароо сынак.

Ош шаардык билим берүү башкармалыгынын жылдык планынын негизинде Ч. Айтматовтун 90 жылдыгына карата Ош шаарындагы жалпы мектептердин башталгыч класстагы окуучулардын “Жомок айтуу” боюнча кароо-сынагы өтүүдө. Аталган сынактын 1-баскычы мектептерде март айынын соңуна чейин өткөрүлүп, ал эми жыйынтыктоочу баскычы апрель айында пландалууда.

ОШТОГУ 10 МЕКТЕПКЕ 300 БАЛАТЫ ОТУРГУЗУЛДУ!

Жазгы жашылдандыруу иштерин Ош шаарындагы билим берүү мекемелери февраль айынан кирише баштады. Бул тууралуу Ош шаардык билим берүү башкармалыгынын башчысы А. Асанов билдирди.

Жазга карата кызуу даярдык азыртан көрүлүп, шаардагы 10 билим берүү мекемесине, тактап айтканда № 2, № 5, № 17, № 26, № 3, № 1, № 47, № 24, № 38, № 41 мектептерге жалпы 300 балаты отургузулду. Балатыны отургузуу иш чарасына Жогорку Кеңештин депутаты, бул саамалыктын демилгечиси Айнуру Алтыбаева өзү катышып, аталган мектептерде болуп кайтты.

 

Жаңы жылдык куттуктоо!

Сиздерди Жаңы жыл майрамы менен чын дилимден куттуктайм! Жаны жыл – бул майрам болуу менен бир катарда жыл ичинде жасалган иштердин жыйынтыгын чыгарууга жана алдыга жаңы максаттарды белгилөөгө жакшы өбөлгө болуп эсептелет.

Ошто балдар үчүн мэрдин жаңы жылдык балатысы өттү

Бүгүн, 25-декабрь күнү Оштогу “Келечек” чыгармачылык балдар борборунда “Мэрдин балатысы” болуп өттү. “Алтын балаты ”деген аталыштагы оюн-зоок программасына шаардын мектеп-интернаттарынан , балдардын ден соолугун калыбына келтирүү борборунан, балдар үйлөрүнөн жана билим берүү мекемелеринен, аз камсыз болгон үй-бүлөлөрндүн балдарынан 200гө жакын бала катышты.